Beth ydy amrywioldeb?

Asesiad

Yn eich Asesiad ar ddiwedd yr Uned hon, bydd gofyn i chi:

  • Ddisgrifio ysytyr y gair ‘amrywioldeb’
  • Adnabod amrywioldeb sy’n bodoli o fewn cymdeithas, gan edrych ar ddiddordebau, cred, oed, ffordd o fyw, nodweddion personol a hunaniaeth ddiwylliannol.
  • Ddisgrifio cyfraniad yr amrywiadau yma i amrywioldeb cymdeithas.
  • Ddisgrifio sut mae amrywioldeb yn cyfoethogi eich bywyd chi.

Bydd hyn yn eich helpu i fodloni meini prawf 2.1, 2.2, 2.3 a 2.4 ar gyfer yr Uned hon. Mae llawer o wybodaeth ddefnyddiol ar y tudalennau sy’n dilyn i’ch helpu gyda rhan yma’r Asesiad.

Mae’r gair amrywioldeb yn golygu gwahanol neu amrywiol. Gallwch weld amrywioldeb mewn unrhyw ddinas, tref neu bentref yn y DU – mae pobl yn wahanol ac yn amrywio mewn llawer o ffyrdd.

Meddyliwch yn gyntaf!

Ydych chi’n gallu meddwl am enghreifftiau o bethau sy’n ein gwneud ni’n wahanol ac yn amrywiol? Sut ydych chi’n wahanol i’ch ffrindiau? Teipiwch eich syniadau yn y blwch isod cyn symud ymlaen.

Nawr cliciwch drwy’r panel i weld rhai enghreifftiau o amrywioldeb mewn cymdeithas.

  • Diddordebau

    Mae ein diddordebau yn ein gwneud ni’n amrywiol (ac yn debyg hefyd). Os ydych chi’n mwynhau mynd i weld gêm bêl-droed, yna byddwch chi’n rhannu’r diddordeb yma gyda nifer o gefnogwyr pêl-droed. Fodd bynnag, byddwch chi hefyd yn wahanol i bobl sydd ddim yn mwynhau pêl-droed.

  • Crefydd a chred

    Mae pobl mewn cymdeithas yn dilyn nifer o wahanol grefyddau (er enghraifft, Cristnogaeth, Islam, Iddewiaeth a Siciaeth). Mae’r holl grefyddau yma’n cyfrannu at amrywioldeb.

    Does gan rhai pobl mewn cymdeithas ddim cred grefyddol chwaith – er enghraifft, pobl sy’n cadw meddwl agored (maen nhw’n ‘agnostig’) neu y rhai sy’n gwrthod credu ym modolaeth Duw neu dduw (maen nhw’n ‘anffyddwyr’).

    Yn ogystal â chred grefyddol (neu ddiffyg cred grefyddol), mae hefyd gan bobl gredoau gwahanol am bethau fel gwleidyddiaeth, addysg, trosedd, perthnasau, ysmygu ac yfed alcohol.

  • Oed

    Mae ein hoedran yn cyfrannu at ein hamrywioldeb – bydd gan bobl o wahanol oed ddiddordebau/hobïau gwahanol, byddan nhw’n mynd i lefydd gwahanol, a bydd ganddyn nhw hoffderau a chredoau gwahanol. Mae pobl yn cael eu dosbarthu yn ôl oed – er enghraifft, plentyn, plentyn yn ei arddegau, canol oed, henoed.

  • Ffordd o fyw

    Mae nifer o ffactorau gwahanol yn dylanwadu ar ffordd o fyw person– gall hyn gynnwys lle maen nhw’n byw, cyfoeth ariannol, eu hobïau/diddordebau, a’u cefndir teuluol. Mae gan bobl yn y DU nifer o wahanol ffyrdd o fyw sy’n gwneud y wlad yn un amrywiol.

  • Nodweddion personol

    Mae ein nodweddion personol yn ein diffinio. Mae enghreifftiau yn cynnwys:

    • Ymddangosiad – megis lliw llygaid, lliw gwallt, lliw croen
    • Anableddau neu amhariadau
    • Rhyw
    • Iechyd
    • Deallusrwydd
    • Hil
    • Ymddygiad/agwedd

  • Hunaniaeth ddiwylliannol

    Gall hunaniaeth ddiwylliannol gynnwys amrywiaeth mewn:

    • Steil ffasiwn ac ymddangosiad corfforol (megis steil gwallt a cholur)
    • Credoau diwylliannol – er enghraifft, gwerthoedd teuluol, ymddygiad ac agwedd
    • Ethnigrwydd
    • Hil
    • Hoffderau bwyd
    • Traddodiadau – er enghraifft, dathliadau, gwyliau a phriodasau
    • Cenedligrwydd
    • Ieithoedd